စိတ်စွမ်းအင်

ဒီလောကကြီးကိုက မပြည့်စုံခြင်း၊ မလိုမပြည့်ခြင်းတွေနဲ့ ပြည့်နှက်နေတာ အားလုံးအသိပါ။ လိုတာမရ ရတာမလို ဆိုတဲ့ စကားတွေ၊ လူအလို နတ်မလိုက်နိုင် ဆိုတဲ့ စကားတွေဟာ ဒါတွေကို အခြေခံပြီး ဖြစ်တည်လာတာပါ။ မိမိရဲ့ လိုအင်ဆန္ဒ မပြည့်လေ စိတ်ဆင်းရဲ ရလေပဲ။ လိုချင်တာရတော့ စိတ်ချမ်းသာ ကျန်းမာ ပျော်ရွှင်နေကြတယ်။ ဒါပေမယ့် လိုချင်မှုက ရပ်မှမသွားတာ ပြန်လိုချင်လာ ပြန်ရော။ လိုချင်တဲ့ အချိန်မှာ ရနေရင် စိတ်ဆင်းရဲမှုတွေ ပျောက်နေတယ်။ လူကလဲ ကျန်းမာရွှင်လန်းနေတယ်။ လိုချင်တာ မရလို့ကတော့ ချွတ်ခြုံကျတော့တာပဲ။ မျက်တွင်းတွေ ချောင်၊ လူက မမာမကျန်းဖြစ်။ စိတ်ထောင်းတော့ ကိုယ်ကျေ တာပေါ့။

ဒီတော့ ဖြစ်စဉ်တွေ အားလုံးက စိတ်နဲ့ ဆိုင်နေတယ်။ တီထွင်မှုတွေ၊ တိုးတက်မှုတွေ အားလုံး အပါအ၀င် လုပ်သမျှ၊ တွေးသမျှ အရာအားလုံးဟာ နောက်ဆုံးတော့ ပြန်ချုပ်လိုက်ရင် စိတ်ကိုပဲ ရောက်သွားတော့တယ်။ ဒါက ဗုဒ္ဓဘာသာဝင်တွေ အနေနဲ့ ပိုသိကြပါတယ်။ ဘယ်လိုပဲ နည်းလမ်းမျိုးစုံနဲ့ လူတွေရဲ့ ပျော်ရွှင်မှုကို ဖန်တီး ဖန်တီး နောက်ဆုံးကတော့ မိမိသည်သာ အဓိက ဖြစ်ပါတယ်။ စိတ်သာ ရှင်စော ဘုရားဟော ဆိုတဲ့ စကားကို ကြားဖူးကြမှာပါ။ ဟုတ်ပါတယ်။ စိတ်သာ အဓိကပါ။ ကျွန်တော် ရပ်တည်နေတဲ့ ခန္ဓာကြီး မပြိုလဲအောင် လုပ်နိုင်တာလဲ စိတ်ဖြစ်သလို ယိုင်လဲသွားအောင် ပြုလုပ်နိုင်တာလဲ စိတ်ပါပဲ။

ဒါကြောင့် ကျွန်တော်တို့အားလုံးဟာ စိတ်စွမ်းအင်ကို တိုးတက်နေအောင် မွေးမြူရမှာ ဖြစ်ပါတယ်။ စိတ်စွမ်းအင် တိုးတက်ဖို့အတွက် စိတ်ကောင်းထားရမှာ ဖြစ်ပါတယ်။ စိတ်ကောင်းရှိဖို့ ပထမလို့ ပြောနေကြတာ စာဖတ်သူတို့ သိပြီးသားပါ။ စိတ်ဓါတ်အင်အား တိုးတက်မှု မကောင်းတာကို ရှောင်ရပါမယ်။ လိုချင်တာကို ရအောင်ယူချင်ယူပါ။ အကယ်၍ မရခဲ့ရင် စိတ်ဓါတ်မကျပါနဲ့။ စိတ်ဓါတ်ကျခြင်းဟာ စိတ်စွမ်းအင်ကို လျော့နည်းစေပါတယ်။ စိတ်ဓါတ်ကျပါများလေ Will Power ကျလေပါ။ မရသည့်အတွက် ဘယ်တော့မှ စိတ်မပျက်စေချင်ပါဘူး။ အပျက်တကာ အပျက်ထဲမှာ စိတ်ပျက်ခြင်းဟာ အဆိုးဆုံးပါပဲ။

ဘယ်အရာဝတ္တုတွေ ပျက်စီးပါစေ စိတ်မပျက်ရင် ဘ၀ကို ရဲရဲရင်ဆိုင် နိုင်ပါသေးတယ်။ ဒါကြောင့် စိတ်တော့ မပျက်လိုက် ပါနဲ့။ လိုချင်တာကို အကြိမ်ကြိမ် ကြိုးစားခြင်းဟာလဲ စိတ်အင်အားကို တိုးစေဖို့ နည်းလမ်းတစ်ခုပါပဲ။ ဘာကြောင့်လဲဆိုတော့ Confident ဆိုတဲ့ မိမိကိုယ်ကို ယုံကြည်နေလို့ပါပဲ။ ယုံကြည်နေတဲ့အတွက် ငါ တစ်နေ သူဌေးဖြစ်ရမယ်၊ အရာရှိဖြစ်ရမယ်၊ ဆရာဝန်ဖြစ်ရမယ် ဆိုတဲ့ ယုံကြည်ချက်နဲ့ စိတ်အင်အားက တွဲပါလာပြီး လုပ်ငန်း မစရသေးခင်မှာပဲ ရာခိုင်နှုန်း ၅၀ က အောင်မြင်ပြီးသား ဖြစ်နေပါပြီ။

ဒါကြောင့် စာအုပ်တွေထဲမှာလဲ ဖတ်ဖူးပါတယ်။ မိမိကိုယ်ကို ယုံကြည်ခြင်းသည် လုပ်ငန်းတစ်ခု အောင်မြင်ရန်အတွက် လမ်းစဖြစ်သည်ဟု ဆိုထားပါတယ်။ ဒါကြောင့် စိတ်ဓါတ်မကျ၊ စိတ်မဆင်းရဲပဲ မိမိတို့ရဲ လိုချင်သည့်အရာတွေကို ရအောင်ယူရင် စိတ်ဓါတ်အင်အားကို တိုးတက်အောင် ဆောင်ရွက်ကြရမှာ ဖြစ်ပါတယ်။
စိတ်ဆင်းရဲခြင်းဟာ အမင်္ဂလာကို ဖြစ်စေပါသေးတယ်။ မနက် မိုးလင်းကတည်းက စိတ်ညစ်တယ်၊ စိတ်ဆင်းရဲတယ် ဆိုပြီး ငြီးတွားနေသူဟာ မနက်ကစလို့ နေ၀င်မိုးချုပ် ဘယ်အရာကို ဆောင်ရွက် ဆောင်ရွက် အဆင်မပြေ ဖြစ်တတ်ပါတယ်။ စိတ်ဆင်းရဲမှုဟာ အဲဒီလောက်ကို ဖြစ်စေပါတယ်။ အလုပ်လုပ်ရာမှာ စိတ်ဆင်းရဲနေပြီး Will Power မပါရှိတဲ့အတွက် အလုပ်တိုင်းကို ဆောင်ရွက်ရာမှာ အဆင်မပြေခြင်းကို ဖြစ်စေတာပါ။ ဒါကြောင့် စိတ်ဆင်းရဲခံမလား၊ Will Power ကို ပဲ တိုးအောင်လုပ်မလား . . . ။

မောင်စေတနာ