11.2.08

ခန္တီစ (သည်းခံခြင်း)

သည်းခံခြင်းနဲ့ ပတ်သက်ပြီး ဖတ်ဖူးတာလေးပါ။ ရယ်စရာလဲကောင်းတယ်။ တစ်ခါက ဘုန်းကြီးတစ်ပါးဟာ သူ့ရွာမှာ တရားပွဲပြုလုပ်တယ်။ အဲဒီတရားပွဲမှာ ခန္တီစဆိုတဲ့ တရားကို ဟောကြားတယ်။ ဘုန်းကြီးက တရားဟောအရမ်း ကောင်းတော့ ရွာသားတွေမှာ ငြိမ်နေတာပဲဆိုပဲ။ တရားက အရှိန်တက်လေလေ တရားနာပရိတ်သတ်များရဲ့ အသံက ငြိမ်ကျသွားလေလေ ဖြစ်နေတယ်။ တရားလဲ ပြီးသွားရော တရားနာပရိတ်သတ်တွေက ဘုန်းဘုန်းဘုရားကို ကန်တော့လိုက်ကြတာ ဖင်ကိုထောင်နေတာဘဲ။ တရားဟော အရမ်းကောင်းတော့ အရမ်းကြည်ညိုပြီးလေ။ အဲဒီနေ့က ဘုန်းဘုန်းရဲ့ ခန္တီစတရားက ရွာထဲမှာ ပြန့်သွားတယ်။ ဘုန်းဘုန်းတရား ကောင်းတယ်၊ ကောင်းတယ်ပေါ့။ တရားမနာရတဲ့ လူတွေကလဲ နာချင်လာကြတယ်။

နောက်တစ်နေ့ရောက်တော့ ဆရာတော်ဘုရားက ဆွမ်းဘုန်းချိန်ရောက်လို့ ဆွမ်းဘုန်း နေတယ်။ အဲဒီမှာ တရားမနာလိုက်ရတဲ့ ဒါယကာ၊ ဒါယကာမတွေရောက်လာတယ်။ အရှင်ဘုရား တပည့်တော်တို့ ဆရာတော်ဘုရားရဲ့ ခန္တီစတရားကို မနားလိုက်ရလို့ ထပ်ဟောတော်မူပါလို့ လျှောက်တင်ကြတယ်။ ဆရာတော်ဘုရားကလဲ ဆွမ်းစားနေရင်း တန်းလန်းနဲ့ တရားဟောရရှာတယ်။ ဒါယကာ၊ ဒါယကာမတွေကလဲ အလိုက်မသိကြဘူး။ တရားနာချင်တဲ့ စိတ်နဲ့ ဘုန်းကြီးဆွမ်းစားနေမှန်းမသိကြတော့ဘူး။ ဆရာတော်ဘုရားကလဲ သည်းခံပြီး ဟောတောမူတယ်။ အဲဒါနဲ့ တရားလဲပြီးရော ဆရာတော်ဘုရားကို ကန်တော့ပြီး ပြန်သွားကြတယ်။

ဘုန်းကြီးလဲ နာရီကို မော့ကြည်လိုက်တော့ အချိန်က(၁၁း၃၀)ရှိနေပြီး။ ဒါနဲ့ စားလတ်စ ဆွမ်းကို ဆက်ဘုန်းတယ်။ နှစ်မိနစ်လောက်အကြာမှာ ဒါယကာတစ်ယောက် ထပ်ရောက် လာတယ်။ အထက်ကအတိုင်းဘဲ ခန္တီစတရားကို ဟောဖို့ လျှောက်ထားတယ်။ ဆရာတော် စားလတ်စ ဆွမ်းက ရပ်ပြီး ဟောတောမူတယ်။ ဒီလိုနဲ့ လာလိုက် ပြန်သွားလိုက်နဲ့ လေးအုပ်စုလောက်ဖြစ်သွားတယ်။ လေးခါလောက် တရားဟောလိုက်ရတယ်။ ဆွမ်းကလဲ ခြောက်ကပ်နေပြီ။ ဆွမ်းဟင်းတွေလဲ အေးကုန်ပြီပေါ့။ နာရီကြည့်လိုက်တော့ (၁၂)နာရီနဲ့ (၅၅)မိနစ်ဖြစ်နေပြီ။ ၁၂ နာရီကျော်ရင် ဆွမ်းငတ်ပြီလေ။ ဒေါသက ထွက်စပြုနေပြီ။

သိပ်မကြာဘူး ဒါယကာတစ်ယောက်တည်း ရောက်လာတယ်။ ဆရာတော်ဘုရား တပည့်တော်ကို သည်းခံခြင်း တရားလေး ဟောကြားတော်မူပါ။ အိမ်က မိန်းမက အမြဲပြဿနာရှာနေတော့ သိပ်သည်းခံချင်တဲ့ စိတ်မရှိတော့ဘူး ဖြစ်နေပါတယ်ဘုရား။ ဒါကြောင့် သည်းခံနိုင်အောင် တရားချီးမြှင့်တော်မူပါဘုရားလို့လဲ လျှောက်တင်ရော ဘုန်းကြီးရဲ့ ထွက်စပြုနေတဲ့ ဒေါသက အထွဋ်အထိပ်ကို ရောက်ရှိသွားတယ်။ တယ်...ဒီဒါယကာနှယ် သည်းခံခြင်းဆိုတဲ့ တရားကို ဒီလောက်တောင်မသိရဘူးလား ....ဆိုပြီး ဘေးမှာရှိတဲ့ လက်ဆေးခွက်နဲ့ ပစ်ပေါက်လိုက်တာ ဒါယကာလဲ ထိပ်ကွဲပြီ တချိုးတည်းလစ်ပြေးပါတော့တယ်။

ဒါပါဘဲ ဘုန်းကြီးတောင် ၄/၅ ခါလောက်ဘဲ သည်းခံနိုင်ရင် ကျွန်တော်တို့ ရိုးရိုးလူတွေက ဘယ်အတိုင်းအတာထိ သည်းခံနိုင်မှာလဲ။ ဒါပေမယ့် သည်းခံပေါ့ဗျာ.....။

မောင်စေတနာ

0 ယောက် မှတ်ချက်ပြုသည်: